Bi, che ti has clicau sin nossa pagina d’internet! Il District da cant ei ina uniun districtuala dalla Surselva. Nus lein dar a tuttas sursilvanas ed a tuts sursilvans la pusseivladad da cantar en in da nos 27 chors mischedai ed 8 chors virils en nossa regiun. Sin nossa pagina „nos chors“ anflas ti ina gliesta da nos commembers! Plinavon essan nus commember dall’Uniun da cant cantunala.
Cantar fa semplamein bein! E malgrad l’epidemia che derasa uonn pigl entir mund entuorn, dat il cant cunfiert. El mument ston ins secuntentar da cantar a casa ni da tedlar las canzuns cantadas sin in disc cumpact. Mo ei vegn puspei il temps che nus savein cantar e star da cumpignia. Nos varga 1’000 commembers conferman quei ed envidan tei a cantar en in da nos 35 chors en Surselva. Il DCS sustegn lur commembers ed il cant ed organisescha ensemen cun ina vischnaunca mintga 4 tochen 6 onns ina fiasta da cant districtuala en Surselva. Las canzuns romontschas spetgan gia da vegnir cantadas da tei!
Nus selegrein da cantar ensemen cun tei đŸ™‚
Egl onn 2017 havein nus ediu in cudisch sur dalla historia dil District da cant. 150 onns District da cant Surselva ei ina cronica ed in disc cumpact che documentescha quei ch’ei stau e quei che ei. Sin 244 paginas, cun biaras fotografias e cun purtrets dils chors sursilvans mireinsa anavos sin la historia dall’uniun, sin las fiastas da cant dapi 1868 e schein vegnir a plaid numerusas persunalitads cun lur anecdotas, reminiscenzas e reflexiuns persunalas. Aposta dil giubileum han 28 chors registrau canzuns ch’ein d’udir sin in disc cumpact „La Surselva conta“. In document unic che muenta speronza era tiu cor. Cudisch e disc cumpact ensemen frs. 40.- Cudisch frs. 25.- Disc cumpact frs. 25.- Tgi che giavischa in exemplar sa cumprar quel tier il president ni ella papeteria Maggi a Glion.
