Reglament

Reglament per fiastas da cant

I. Remarcas generalas
Tuttas indicaziuns pertuccont las funcziuns valan per omisdus schlatteinas.

La fiasta da cant sursilvana vegn per regla realisada mintga quater onns.
Collisiuns cun fiastas da cant dils districts vischinonts, cantunalas e federalas
duein vegnir evitadas.

Il DCS ei l’uniun purtadra dalla fiasta da cant. L’organisaziun dalla fiasta vegn
surdada ad in chor dil DCS. Quei chor definescha in comite d’organisaziun (CO)
al qual cumpeta la direcziun. A quei comite fa silmeins in commember
dalla suprastonza, sco era in commember dalla cumissiun da musica dil DCS
part.

Per mintga fiasta da cant elaborescha il CO en collaboraziun cun il DCS
in regulativ d’organisaziun, il qual sto vegnir approbaus dalla suprastonza
dil DCS e dil chor organisont.

La participaziun dils chors dil DCS allas fiastas da cant ei giavischada.
Allas fiastas san era chors hospitonts separticipar. Quels san vegnir envidai
en accordanza culla suprastonza dil DCS.
II. Cumpetenzas
La radunonza da delegai (RD) fixescha il liug ed igl onn da fiasta.
L’elecziun dil chor tscharniu succeda dus onns avon la realisaziun dalla fiasta.

La suprastonza dil DCS ensemen cun la cumissiun da musica ein
responsabels per
a) la purificaziun dil program da fiasta ensemen cun il CO
b) la fixaziun dalla successiun dallas canzuns da pag
c) la tscharna dils experts da cant
d) l’organisaziun dallas canzuns generalas
e) l’acceptanza e collaudaziun dallas localitads da cantar en
f) l’evaluaziun finala dalla fiasta

Il chor organisont surpren
a) la formaziun dil CO
b) la responsabladad per la fiasta

Il CO ei responsabels per tut ils pensums, ils quals ein buca reparti
specialmein ad in auter organ. El ei responsabels en special per
a) la preparaziun dil program da fiasta
b) l’organisaziun dalla fiasta da cant, en special seigi numnau il program
     accumpignont, igl act festiv, las localitads da presentaziun e da cantar en,
     sco era las invitaziuns
c) la contabilitad ed il rendaquen
d) il rapport final per mauns dalla suprastonza dil DCS
III. Presentaziuns dils chors
L’annunzia da participaziun secumpona d’indicaziuns generalas davart il chor,
sco era d’indicaziuns davart la(s) canzun(s) da pag cun aschuntar las partituras
da tala(s).

L’annunzia per la participaziun alla fiasta districtuala sto succeder a scret
all’adressa dil CO dil chor organisont.
L’annunzia definitiva da mintga chor ei d’inoltrar silmeins sis meins avon
la fiasta da cant.

L’organisaziun dil cant communabel ei caussa dalla suprastonza dil DCS e
dalla cumissiun da musica da tal. Eventualas canzuns generalas ein da tarmetter entras la cumissiun da musica dil DCS per l’entschatta digl onn da cant
al qual la fiasta da cant sespleiga.

Il dirigent dil liug da fiasta diregia ils chors generals da sia sparta.
Ils auters chors vegnan diregi alternontamein d’in dirigent ord la cumissiun
da musica.
IV. Giudicaments
La presentaziun dil singul chor sa succeder cun ni senza giudicament.

Sin proposta dalla suprastonza dil DCS fixescha la RD il modus da giudicament
en in “Reglament da giudicament” special. Quei reglament cumpeglia ils criteris da giudicament, la(s) fuorma(s) da giudicament, la fuorma dalla publicaziun
dil giudicament, las categorias, sco era la moda da distincziun.
V. Finanzas
Il chor organisont ei responsabels per las consequenzas finanzialas dad ina fiasta da cant.

Tuts cuosts en connex cun la fiasta van a quen al CO.
En special ha el da surprender:
a) ils suandonts cuosts dils experts da cant: honoraris, ils cuosts da cuost e loschi
     e da viadi (era d’ina eventuala sesida preparatoria avon la fiasta), Rapports
     tenor las directivas dall’Uniun da cant federala
b) tut ils cuosts dil DCS che seresultan en connex cun la fiasta
c) ils cuosts per il squetsch e spediziun dils rapports dils experts
d) las cartas da fiasta per ils hosps envidai

Il DCS desita da scadina compart dil gudogn dalla fiasta, damai ch’il CO,
resp. il liug da fiasta, surpren tuts cuosts en connex cun tala.

Sespleiga ina fiasta da cant senza giudicaments, ei il chor organisont
obligaus da prestar alla cassa dil DSC ina contribuziun fixada
entras la suprastonza dil DCS.

La fixaziun dils prezis d’entrada per visitaders dalla fiasta, sco era per la carta
da fiasta, ei caussa dil CO en cunvegnientscha cun la suprastonza dil DCS.

Retrai in chor annunziau sia annunzia entiramein ni parzialmein
(singuls commembers), eis el obligaus da restituir al CO
las suandontas contribuziuns:
– entochen in meins avon l’entschatta dalla fiasta sa il CO pretender
   20% dil prezi dalla carta da fiasta
– entochen diesch dis avon l’entschatta dalla fiasta sa vegnir pretendiu
  30% dil prezi dalla carta da fiasta
– per cartas da fiasta che vegnan returnadas il di da fiasta ni pér suenter tala,
   exista negin’obligaziun da restituziun.
VI. Determinaziuns finalas
Quest reglament ei vegnius approbaus dalla radunonza da delegai dil
District da cant Surselva, ils 13 da november 1999. Il reglament va directamein
en vigur.

Sagogn, ils 13 da november 1999

La presidenta                             L’actuara
Annalisa Candrian                    Lucrezia Berther