I. Num, sedia  e finamira

Art. 1 Il District da cant Surselva (DCS) ei in’uniun fundada egl onn 1867 tenor art. 60 ff dil cudisch civil svizzer cun sedia el liug da dimora dil president dil DCS. Il DCS ei commember dall’Uniun cantunala da cant e dall’Uniun dils chors svizzers. Tuttas indicaziuns pertuccont las funcziuns valan per omisduas schlatteinas. Art. 2 Il DCS ha la finamira da cultivar e promover il cant enteifer siu district. El sustegn las activitads dils singuls chors. El promova la qualitad e la derasaziun dil cant. Art. 3 Mintga quater onns duei per regla haver liug ina fiasta da cant districtuala, organisada ton sco pusseivel alternontamein entras ils pli differents chors dil DCS. La reglamentaziun davart fiastas da cant ei fixada en in reglament special (cf. Reglament per fiastas da cant dil District da cant Surselva).

II. Commembradi

Art. 4 Daventar commember dil DCS san tut ils chors virils, chors mischedai, chors da dunnas e chors d’affons e giuvenils dalla Surselva, Trin e Stussavgia, e che adempleschan las obligaziuns stipuladas. Chors d’auters districts che vulan far part al DCS ein beinvegni. Art. 5 Scadin chor sa sortir dil DCS, aschianavon ch’el ha adempliu las obligaziuns materialas e finanzialas viers quel. Tal chor piarda scadin dretg da facultad e d’organisaziun viers il DCS.

III. Organisaziun

Art. 6 Ils organs dil DCS ein: a) la radunonza da delegai b) la suprastonza c) la cumissiun da musica d) ils revisurs da quen

1. La radunonza da delegai

Art. 7 La radunonza annual da delegai ha liug per ordinari la primavera e vegn convocada dalla suprastonza dil DCS. Art. 8 La radunonza da delegai secumpona a) dils delegai dils chors b) dalla suprastonza c) dalla cumissiun da musica d) dils revisurs da quen e) dils commembers d’honur Art. 9 Scadin chor deleghescha minimum dus representants alla radunonza da delegai. Chors cun 40 e dapli commembers han il dretg da delegar treis representants alla radunonza da delegai. Art. 10 Alla radunonza da delegai han il dretg da vuschar a) ils delegai b) la suprastonza c) la cumissiun da musica d) ils revisurs da quen e) ils commembers d‘honur Art. 11 Radunonzas extraordinarias da delegai san vegnir convocadas a) entras la suprastonza e la cumissiun da musica b) entras silmeins diesch chors dil DCS Art. 12 La radunonza da delegai tracta las suandontas fatschentas: a) Eleger il president, ils ulteriurs commembers dalla      suprastonza, la cumissiun da musica ed ils revisurs da quen      per in bienni da treis onns b) Approbar ils protocols, ils quens ed il preventiv c) Fixar la contribuziun annuala dils chors d) Recepir novs commembers e) Fixar il liug da fiasta da cant f) Concluder eventualas revisiuns dils statuts g) Nominar commembers d’honur sin proposta dalla suprastonza h) Deliberar ulteriuras propostas che neschan ord la radunonza, sch’ellas      crodan buc en cumpetenza dalla suprastonza i) Pretender ina revisiun dils statuts, sche 2/3 dils delegai presents     ein persuenter.

2. La suprastonza dil DCS

Art. 13 La suprastonza dil DCS secumpona ord treis commembers. Il president e dus commembers che fan part ad in chor dil DCS. Il president vegn elegius a caschun dalla radunonza da delegai. L’ulteriura suprastonza constituescha sesezza. Art. 14 La suprastonza dil DCS ha las suandontas obligaziuns: a) Convocar las radunonzas b) Presentar alla radunonza da delegai protocols, rendaquen,        preventiv e program da lavur c)  Proponer alla radunonza da delegai       – commembers per la cumissiun da musica       – liug da fiasta da cant       – revisiuns da Statuts       – commembers d’honur d) S’engaschar en collaboraziun cun la cumissiun da musica per la       promoziun dalla cultura da cant Art. 15 a) Il president representa il DCS anoviars. b) El convochescha sedutas da suprastonza. c) El meina las radunonzas. d) El decida en cass da paritad da vuschs. e) El ei commember dalla cumissiun da musica

3. La cummissiun da musica

Art. 16 La cumissiun da musica secumpona da treis commembers. Dus vegnan elegi dalla radunonza da delegai sin proposta dalla suprastonza. Il tierz ei il president dil DCS. La cumissiun da musica tscharna il president ed igl actuar ord lur miez. Allas sesidas dalla cumissiun da musica sa tenor basegns e giavisch vegnir envidau ulteriuras persunas dil fatg. Art. 17 La cumissiun da musica s’engascha en special per la vart musicala dil DSC. La cumissiun da musica elaborescha concepts, finamiras e strategias a pli liung temps davart las activitads canticas dil DSC per mauns dalla suprastonza.

4. Ils revisurs da quen

Art. 18 Ils revisurs da quen dil DCS revedan ils quens e dattan rapport alla radunonza da delegai.

IV. Finanzas

Art. 19 Igl onn da quen dil DSC siara giu mintgamai sin ils 31 da december. Art. 20 Per cuvierer ils cuosts administrativs dil DSC, sco era per ils basegns finanzials per la promoziun dil cant, paga scadin chor ina contribuziun annuala per commember. Chors d’affons e da giuvenils pagan negina contribuziun annuala. Art.21 Ils commembers dalla suprastonza e dalla cumissiun da musica vegnan indemnisai per las sesidas.

V. Honoraziuns

Art. 22 Cantaduras e cantadurs che han cantau silmeins 25 onns en in chor dil DCS vegnan numnai veterans districtuals. Art. 23 Dirigents cun in’activitad da 20 onns en in chor dil DCS vegnan medemamein honorai. Art. 24 Las suprastonzas dils singuls chors ein obligadas d’annunziar alla suprastonza dil DCS lur veterans e honorai. Tuttas honoraziuns han liug mintgamai a caschun dalla radunonza generala da delegai. Art. 25 Commember d’honur sa ina persuna daventar, ch’ei sefatga specialmein meriteivla pil DCS.  Art. 26 Sco renconuschientscha retscheivan ils veterans districtuals, ils dirigents honorai ed ils commembers d’honur ina distincziun.

VI. Determinaziuns finalas

Art. 27 Per saver prender conclus davart ina dissoluziun dil DSC ston 2/3 da tut ils chors esser representai tras lur delegai alla radunonza. Il conclus succeda cun ina maioritad da 2/3 dils votants presents. El cass d’ina dissoluziun dil DCS ha quel neginas obligaziuns enviers ils chors. Pertuccont la facultad ed igl inventari vegn decidiu a caschun dalla radunonza da dissoluziun. Quels status van en vigur cun l’approbaziun entras la radunonza da delegai dils 31 da matg 2019 e remplazzan tals dils 13 da november 2012. Ruschein, ils 31 da matg 2019 Il president                                         L’actuara Ewald Vinzens                                   Maria Candinas